ਬੈਲਜੀਅਮ ਵਿੱਚ ਅੱਜ, 7 ਅਕਤੂਬਰ ਦੀ ਸ਼ਾਮ ਅਤੇ ਰਾਤ ਨੂੰ ਮੀਂਹ ਤੇ ਤੇਜ਼ ਹਵਾਵਾਂ ਦੀ ਸੰਭਾਵਨਾ ਹੈ। ਸਮੁੰਦਰੀ ਤੱਟ ਉੱਤੇ ਹਵਾ ਦੇ ਝੱਖੜ 70 ਤੋਂ 85 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਪਹੁੰਚ ਸਕਦੇ ਹਨ। ਤੱਟਵਰਤੀ ਇਲਾਕਿਆਂ ਲਈ ਕੋਡ ਯੈਲੋ ਜਾਰੀ ਕੀਤਾ ਗਿਆ ਹੈ ਅਤੇ ਮੌਸਮੀ ਨੁਕਸਾਨ ਲਈ ਮਦਦ ਵਾਸਤੇ 1722 ਨੰਬਰ ਸਰਗਰਮ ਕੀਤਾ ਗਿਆ ਹੈ।
ਮੌਸਮ ਵਿਭਾਗ KMI ਮੁਤਾਬਕ, ਤੇਜ਼ ਹਵਾਵਾਂ ਦੀ ਚੇਤਾਵਨੀ 7 ਅਕਤੂਬਰ ਸ਼ਾਮ 6 ਵਜੇ ਤੋਂ 8 ਅਕਤੂਬਰ ਸ਼ਾਮ 4 ਵਜੇ ਤੱਕ ਹੈ। ਸ਼ਾਮ ਅਤੇ ਰਾਤ ਦੌਰਾਨ ਮੀਂਹ ਦੇਸ਼ ਦੇ ਸਾਰੇ ਇਲਾਕਿਆਂ ਵਿੱਚ ਫੈਲ ਸਕਦਾ ਹੈ ਅਤੇ ਕੁਝ ਥਾਵਾਂ ’ਤੇ ਗਰਜ-ਚਮਕ ਵੀ ਹੋ ਸਕਦੀ ਹੈ।
ਮੀਂਹ ਦਾ ਵੱਧ ਅਸਰ ਦੇਸ਼ ਦੇ ਦੱਖਣ-ਪੂਰਬੀ ਹਿੱਸੇ ਵਿੱਚ ਰਹਿਣ ਦੀ ਸੰਭਾਵਨਾ ਹੈ। Sambre ਅਤੇ Meuse ਦਰਿਆਵਾਂ ਦੇ ਦੱਖਣ ਵੱਲ 25 ਤੋਂ 35 ਮਿਲੀਮੀਟਰ ਅਤੇ ਕੁਝ ਥਾਵਾਂ ’ਤੇ 40 ਤੋਂ 50 ਮਿਲੀਮੀਟਰ ਤੱਕ ਮੀਂਹ ਪੈ ਸਕਦਾ ਹੈ।
ਜੇ ਤੂਫ਼ਾਨ ਜਾਂ ਪਾਣੀ ਭਰਨ ਕਾਰਨ ਅੱਗ ਬੁਝਾਊ ਸੇਵਾ ਦੀ ਮਦਦ ਚਾਹੀਦੀ ਹੋਵੇ ਅਤੇ ਕਿਸੇ ਦੀ ਜਾਨ ਨੂੰ ਖ਼ਤਰਾ ਨਾ ਹੋਵੇ, ਤਾਂ 1722 ਜਾਂ www.1722.be ਵਰਤੋ। ਜਾਨ ਨੂੰ ਖ਼ਤਰਾ, ਅੱਗ ਜਾਂ ਜ਼ਖ਼ਮੀਆਂ ਵਾਲੀ ਸਥਿਤੀ ਵਿੱਚ 112 ਉੱਤੇ ਕਾਲ ਕਰੋ।